Mirror 演唱會已經圓滿結束,無論係演唱會期間定係到依一刻,都可以係社交平台上面見到舖天蓋地嘅報導同 fans 們嘅轉載,真心好勁!除咗當中比較人氣嘅成員之外,今次有唔少成員表現都非常突出,令人喜出望外!其中一位,一定要數到 Mirror「顏值擔當」Frankie(陳瑞輝)!
大家可能對 Frankie 嘅印象都係「好靚仔」、「跳舞好勁」,同埋參加全民造星嘅時候,成日比人批評唱功差⋯但今次演唱會佢真係光芒四射!Fans 仲話佢嘅唱功有「神級大進步」,連花姐都大讚「佢唱得比我想像中好」!可見 Frankie 真係有默默努力令自己更進步!雖然未有太多演出機會,但相信佢都係一隻優質潛力股!
【5個成為Frankie忠粉必知小秘密】
#1 男人年紀不是秘密
其實 Frankie 係 Mirror 入面最年長,佢 1988 年 7 月 29 日出世,今年其實已經 33 歲!不過年紀唔算係大問題,80 後都好年輕,仲有大把發展空間!
#2 Fans們叫皮寶寶
點解 Fans 們會叫「皮寶寶」咁可愛呢~因為 Frankie 講過,自己個名讀得快,聽起嚟似「粉皮」,所以 Fans 都會叫佢「皮皮」~
#3 有一位拍拖超耐嘅女友
天啊!生得靚仔、仲要專一長情,你玩晒啦?Frankie 有一位拍咗 11 年拖嘅女朋友,佢都係 Dancer 嚟㗎!雖然係偶像男團一員,但佢冇隱暪自己有女友一事,值得一讚啊,冇呃 Fans!
#4 有明星堂妹
原來大台女星陳偉琪係 Frankie 嘅堂妹!良好家族基因啊⋯皮皮生得靚仔、陳偉琪身材又勁好⋯啊~~想加入你哋個家族~~
#5 Mirror入面最熟係?
皮皮曾經係訪問中透露,佢係 Mirror 12子入面同 AK、Lokman 最熟~Lokman 話可能大家都鍾意跳舞、年紀又差唔多!不過有睇開 Mirror 嘅人,應該都會感受到,12子其實超團結、個個感情都好好!
圖片來源:frankie729@Instagram