近日有20歲男網民以「點解條女唔應我? 咁樣嘅回覆好似係」為題喺討論區發文，表示自己喺半年前玩交友 app，但對方對佢嘅反應好冷淡而且仲已讀不回咗佢。經過深思熟慮之後，佢決定喺討論區上面尋求網民嘅意見同幫助。一齊嚟睇下到底呢位網民發生咗咩事啦～

喺啲對話 cap圖入面，我哋可以見到樓主一開始用英文作自我介紹，更表示自己係諗住搵到共渡餘生嘅另一半，認真尷尬啊！而當樓主問對方聖誕節有冇野做個陣，對方已經暗示冇節目，但樓主居然收回前言，甚至開始自問自答，真係令人大跌眼鏡啊！

有唔少網民喺睇到樓主嘅對話cap圖之後，大呷：好尷尬！因為樓主喺對話入面不停糾結係英文嘅問題上，仲不停拋書包，令唔少網民覺得激似小組討論，更有人話「你覆親都咁大段感覺少 chur」、「隔住個mon都覺得尷尬」。

不過亦都有好心嘅網民列出一系列實用嘅改善建議俾樓主，希望樓主可以從中學習。網民嘅意見非常實用，有興趣嘅網民都可以一齊參考下㗎～

不過溝通呢啲野都係要慢慢學嘅，希望樓主加油，早日出pool啦～

Source：lihkg