MIRROR成軍2年，粉絲們終於等到「鏡仔」開演唱會啦！官方宣布將於5月6至8日連開3場演唱會《MIRROR “ONE & ALL” LIVE 2021》！講起MIRROR，大眾第一時間都會諗起姜B（姜濤），但對於鏡粉嚟講，其他成員一樣好有實力，好多令人欣賞嘅地方等待大家發掘㗎～而今日小編就要介紹最近正式單飛嘅成員Edan（呂爵安）啦！Edan 於2018年參加《Good Night Show 全民造星》並獲得第8名，後加入男子組合MIRROR。等待接近2年時間，終於喺今年1月推出首支個人單曲《E先生連環不幸事件》。

Edan 可算係「最佳男朋友」代表，因為佢有才華、搞笑、又讀得書，背景完全唔講得少！原來Edan 係讀可風中學及香港大學工商管理學（資訊系統），名乎其實嘅學霸，就算喺讀書期間參加《Good Night Show 全民造星》依然能夠順利畢業，仲拎到第8名成功出道！Edan喺參加《全民造星》時被視音樂才子，細細個就鍾意唱歌、跳舞，而且鋼琴同小提琴都考獲八級成績，可以自彈自唱好有才華～亦都得到唔少前輩賞識，成為吳業坤及鄭秀文嘅演唱會嘉賓，又因為同羅家英去台灣拍攝電視節目而熟絡，有機會去家英哥屋企拜年。

唔講唔知，Edan 原來有個細佢6年嘅妹妹，佢私底下係一個超錫細妹嘅暖男～亦稱妹妹為「小可愛」、「心肝寶貝」，不時都會見到Edan 上載同妹妹嘅合照，寵妹程度100分，粉絲們表示自己都好想要咁樣嘅哥哥啊！

Edan 樣子討好但完全無偶像包袱，最近佢同成員Anson Lo 拍攝港版《大叔的愛》，喺預告入面佢唔理醜態大擺鬼臉，幽默感十足！好期得呢套劇出街嘅日子啊～