自超人氣BL劇港版《大叔的愛》完播後，網民就一直敲碗要 ViuTV 快啲出新劇！而ViuTV都聽到大家嘅要求，上月中就為佢哋嘅游泳題材新劇《i.SWIM》進行網上選角活動～～臨近開拍，參演嘅演員亦都一一暴光！ MIRROR 中就有兩位鏡仔確定會參演，佢哋仲要暗示自己已經開始密密操肌，務求令大家一飽眼福啊！

# ViuTV 《i.SWIM》—— Edan、Stanley@ MIRROR 確定參演

男主角人選之一嘅鏡仔就大家都好熟悉㗎啦！佢就係田田Edan呂爵安啊！田田之前就曾經爆響口，話要練大隻，仲要罕有咁同大家分享自己嘅「肉照」，睇嚟對自己操肌嘅進度都好滿意！

另一位要參演嘅鏡仔就係我哋嘅大表哥Stanley邱士縉！早前接受傳媒訪問嘅時候，佢就透露會參演，仲話要練水同操肌喎～～不過，大表哥身材一向都夠火辣，再操…小編驚會焫着晒全部鏡粉！！

除咗兩位鏡仔，男主角人選就仲有ViuTV小鮮肉男神魏浚笙（Jeffrey)！憑着一副輪廓立體嘅少女初戀面孔，Jeffrey深受各大廣告品牌嘅喜愛！而早前參演《膠戰》亦令Jeffrey人氣急升！今次參加ViuTV新劇，Jeffrey亦透露已經加緊特訓，努力操肌～～各位可以期待一下！

嘩！今次ViuTV新劇集齊咁多靚仔小鮮肉，真係超！期！待！仲要可以攞正牌睇肌肉！太幸福啦～有傳《i.SWIM》今個月月尾就會開拍！希望可以早日開播啦！

SOURCE：VIUTV、IG@Edanlui、Stanleysc_、jeffreyngai

延伸閱讀：

【牛下女車神感人故事！李慧詩奧運背後辛酸史！「我想像流星般影響他人」】

【年齡相差20年！ 英國跳水王子 與老公超浪漫 愛情故事 ！丈夫是奧斯卡金像獎編劇！】