又係我啊，姜糖小編啊。不過今次我強忍 cover 姜B 嘅衝動，因為我今日要講嘅係 Mirror@Jeremy（李駿傑）！Jeremy 一直都比較低調，但係每次影團體照都好難忽視佢嘅存在，因為佢實在太花美男，真心靚過女人！最近佢仲同姜B 一齊接咗化妝品廣告，裡面嘅 Jeremy 同姜B 真係靚到好似一幅畫～為咗令大家更了解 Jeremy，姜糖小編努力做咗 research，希望同所有鏡粉一齊再一次愛上李駿傑！

#1 有諗過放棄演藝夢想

Jeremy 細細個就立志要做歌手，大個仔之後參加過大陸嘅《快樂男聲》、《中國好聲音》、韓國娛樂公司練習生選拔等等，可惜次次都係海選階段被淘汰⋯佢仲話自己有 set 時限，如果 25 歲仲未有起色，就放棄演藝夢想！好彩最後 Jeremy 係全民造星有唔錯嘅表演，最後仲入埋 Mirror！

#2 Fans叫unicorn（獨角獸）

姜濤 Fans 叫姜糖、Anson Lo Fans 叫教徒，咁 Jeremy Fans 叫咩呢？答案係 unicorn（獨角獸）！因為 Jeremy 經常以唔同嘅髮色示人，Fans 覺得佢就好似獨角獸一樣咁色彩豐富～

#3 絕密擇偶條件

Jeremy 曾經係訪問入面透露，自己好鍾意笑起嚟可愛、性格善良有愛心嘅姐姐！順帶一提，Jeremy 今年 26 歲，各位姐姐係咪突然覺得世界很美好？前提係，你要忍受另一半仲靚過自己⋯

#4 Jeremy 演過同志角色

其實 Jeremy 上年有出演過網劇《把砒霜留給自己》，而且仲係入面演同志角色，同劉浩龍大玩師生戀！劉浩龍仲讚 Jeremy 唔似第一次拍戲，驚恐嘅表情、內心嘅驚慌等等都表現得非常好。如果你哋想睇佢兩個係男廁談情，就記得睇下套劇喇～

#5 最鍾意 minions 同埋 ONE PIECE

雖然 Jeremy 外表非常韓系花美男，又好似不食人間煙火咁，但其實佢都好貼地～佢最鍾意嘅卡通人物係可愛嘅小黃人 minions，同埋超人氣漫畫 ONE PIECE。順帶一提，佢同普通男仔一樣都鍾意打機，不過就比較愛好「唔用腦嘅game」⋯

#6 鍾意睇哲學書

想像下，Jeremy 嘅樣、配返副書生眼鏡，再手執一本望落好深嘅哲學書，成個畫面會唔會太靚啊！係天堂嚟嘅天使啊！！！！！

圖片來源：jeremy_0908@Instagram