ViuTV 又有新搞作!佢哋預定於 4 月 5 日播出全新 5 集短劇《YOLO的練習曲》,以偽真人 Show 方式大爆女子組合私下到底有咩八卦!真係諗下都興奮!一班女人打生打死!不過呢,講得係女子組合,咁當然要搵一班年輕美女做女團成員啦!今日就揀咗 5 個受(男)網民熱捧嘅女神出來,睇下你又有冇覺得邊個有潛質?
#001 郭爾君(Alma)
「文青女神」雖然到處都係,不過最近比較搶眼嘅有郭爾君(Alma),氣質有少少似「元祖真文青」蔣雅文(Mandy)~講個秘密比大家知,佢係女團成員中年紀最大,已經 27 歲,不過著上女團製服都毫無違和感!
大家有冇覺得佢有少少熟面口?因為佢都出演過唔少廣告同 MV,例如林家謙〈下一位前度〉、陳柏宇〈悔過書〉等等~
#002 歸南茜(Nancy)
個樣是咪好似混血兒?連個名都好特別!佢係一位模特兒/攝影師,最搶鏡係拍過大金冷氣電視廣告同 Dear Jane〈未開始已經結束〉MV~
#003 Jeannie
有睇試當真嘅人,應該都會認得 22 歲嘅 Jeannie,因為自從出演咗 YouTube 短片,就比人封佢做「港版周子瑜」!大家睇下佢 IG,有啲相又真係幾有韓星味~
#004 黃曉文(Candy)
Mirror Fans 一定認得佢,因為佢曾演出過姜濤同 Ian陳卓賢〈戀愛要在生日前〉MV!佢本身係模特兒,所以身材勁好,對腳好長,仲有唔少網民覺得佢係女團入面最靚一位!
#005 李冠渝(Bella)
Bella 未係幕前出現時,係做空姐㗎!雖然唔係傳統式超靚嘅女仔,但就勝在好 gf-able!男仔見到一定暈晒大浪~~順帶一提,佢會係 YouTube Channel《冬OT》出演㗎!