姜糖忠心程度大測試!8個你一定要知姜濤小秘密!疫巿收入贏陳奕迅?!

依家真係走到邊都見到姜濤啊!咁大紅大紫嘅偶像,小編會諗起當年嘅 Twins⋯不過都唔知幾多年前了~雖然好多人都聽過姜B 個朵,但係你又知佢幾多嘢呢?可能睇完依篇文章你都會變成姜糖!已經係姜糖嘅人,就睇下自己係咪全部知晒啦!

#1 姜濤 2017 年已經參加選秀

原來姜B 第一次參加嘅唔係 ViuTV《全民造星》!自細鍾意唱歌跳舞嘅姜濤,係 2017 年已經去咗內地參加選秀節目《快樂男聲2017》,而且仲成為港澳四位代表之一添!後來仲係節目入面,衝到去 30 強!

#2 肥仔都是潛力股

唔好見姜B 依家咁 fit,其實佢讀書時代係一個 200 磅肥仔!但係佢見到偶像羅志祥小豬,都係由肥仔變靚仔,就拼命去減肥!大家,肥仔(多數)都係潛力股啊~

#3 姜濤戀愛史第一集

姜濤透露中一嘅時候,鍾意過一個女仔,仲同佢表白添!但係該位女仔就話自己係「外貌協會」,拒絕咗姜B⋯唉~唔知依位小姐有冇後悔呢?

#4 男神仲係處男

之前姜濤係陳志雲現場直播網上節目《Stephen傾》透露,話自己依家冇拍拖,仲承認自己係處男!!啊!!Fans 們要暴動喇!!

#5 香港史上最年輕「我最喜愛男歌手」

年紀輕輕嘅佢今年先 21 歲,仲要打破紀錄,成為叱咤樂壇流行榜頒獎典禮、最年輕「我最喜愛男歌手」!話說當時姜濤個驚訝樣真係好鬼可愛!

#6 疫巿收入贏陳奕迅?!

之前有本地媒體話,2020 年姜濤收入竟然超過樂壇大大大前輩陳奕迅!勁多大牌子廣告唔使講,上年仲飛咗去台灣拍劇,真心超吸金!

#7 童年慳家大個孝順

真係孝感動天啊!姜濤係陳志雲訪談節目《Stephen傾》話,自己童年試過早餐一碗公仔麵,要同爸爸分,姜B 就食麵、爸爸就淨係飲湯。所以姜B 依家好努力工作,就係為咗搵多啲錢、令屋企人生活更好!

#8 對自己超有要求!

點解姜B 會咁紅?點解姜糖咁愛佢?因為佢真係好令人 respect!佢曾經講過,出席公開活動前,都會提早 30 分鐘至 1 小時起身運動!

圖片來源:姜濤 Instagram