無線藝人衛志豪於（9日）參加節目《開心大綜藝》，並在IG限時動態直播台前幕後準備狀況。不料竟引來網民私訊攻擊，直指節目很老土，並傳送MIRROR成員Anson Kong同姜濤的照片給衛志豪，令到衛志豪嬲爆。

一開始網民指節目很老土時，衛志豪只回覆了一個笑哈哈emoji；但當網民再回話指正在看年青人並附上Anson Kong和姜濤的照片時，衛志豪直指「關我咩事」；及後網民回應「你們節目太老土，阿婆都唔睇」，衛志豪大為憤怒並發火回應。

後來網民向衛志豪表示打錯並向其道歉，但衛志豪並不接受，翌日早上更發千字文，將兩人對話公開叫大家評理。他指自己嬲到「瞓唔着」，他反問：「我想問吓識得我嘅朋友，有冇人可以答到我，呢個人究竟正職係做乜，友台工作人員、演唱會宣傳人員、藝人經理人、定保母？」

衛志豪最後更直言「我歡迎娛樂圈百花齊放，但最憎唯恐天下不亂，同佢做朋友嗰啲請小心，你拜咩嘢神咩教到你咁。我唔認識呢班後生仔，佢哋都唔會識我，但我都佩服佢哋！祝演出成功﹗如有失言請見諒﹗」曹永廉更留言撐衛志豪。

不過有不少網民指「唔識MIRROR但又話自己做娛樂圈一段日子！睇黎你唔適合做呢行喇！」、「你太out」等。