呢兩日最轟動韓國娛樂圈嘅新聞一定係宋仲基同宋慧喬離婚兩年後，日前公佈同英國女友 Katy Louise Saunders 結婚，仲雙喜臨門成為爸爸！不過似乎宋仲基嘅父母對於呢段婚姻唔太看好，韓媒《Sports Seoul》曾經致電畀宋仲基爸爸，一知道對方係記者，沈默咗一下就收咗線掛斷；而媽媽只係回覆咗一句「無話可說」。

當初「雙宋聯婚」，宋仲基父母曾向鄰居表示「很希望（宋仲基、宋慧喬）能生個小孩幸福生活」。面對媒體時，仲熱情地幫新抱宣傳當時嘅新作品《男朋友》，展現對新抱滿滿嘅愛。而兩人離婚時，宋仲基爸爸難過到失聯兩日，對離異很自責，表示「這一切都是我與仲基的不足。」

韓國論壇都喺度討論宋仲基父母唔鍾意現任妻子Katy嘅原因，都離不開對方年紀太大、語言同文化唔同。Katy 今年 39 歲較大齡，加上過去性感艷星嘅形象令長輩難以接受。另外，Katy仲被爆料係兩個孩子嘅單親媽媽，令呢個新抱喺充滿傳統觀念嘅老爺奶奶眼中唔太合格～

有部分韓國網民都唔太睇好宋仲基今次嘅婚事，認為佢兩次都係閃婚，屬於「戀愛腦」，一次衝動做出嚟嘅決定唔係經過深思熟慮，好容易出事。同埋宋仲基當初離婚時，仲喺協議階段就搶先公佈消息，令人感覺自己係「受害者」，令前妻深受媒體同網絡嘅衝擊。

宋仲基所屬經紀公司 HighZium studio 透露宋仲基同Katy已經登記結婚，確定會舉行婚禮，但具體日期未定，預計會喺韓國同英國兩邊生活。