「又不是八十年代～寂寞芳心的愛～」當年一首《心急人上》，唱到個個都知有隊「九餅」！當時好多人覺得佢哋同 Twins 有得 Fight 㗎，可惜之後就解散咗⋯除咗比較出名嘅幾位 Cookies 成員之外，唔知其他人有冇走樣呢？大家快啲嚟八卦下！

#001 鄧麗欣（Stephy）

發展得最好一定係 Stephy，仲活躍於娛樂圈，又積極參與唔少本地創作，真心係「真女神」！而且同王子一齊之後，仲多咗好多台灣人識佢～

#002 傅穎（Theresa）

佢近幾年都係大陸發展，不過最近都返咗香港，拍咗 ViuTV 劇集《熟女強人》。不過網民經常話佢個樣不斷進化，好似愈大愈靚女咁。

#003 楊愛瑾（Miki）

Miki 係 2016 年同永安集團太子爺郭永淳結婚，之後就好少出現係幕前，專心做少奶奶～但係佢都有 keep 住 update Intagram，可以見到佢都仲保養得幾好！

#004 吳雨霏（Kary）

大家公認全隊唱歌最好聽嘅 Kary，係 2015 年同網球王子洪立熙結婚，之後就冇咩出歌了，好可惜啊！同埋可能做少奶奶生活好，個樣都仲係 keep 到喎！

#005 區文詩（Angela）

Angela 其實都算係半個娛樂圈人，自從退出 Cookies，佢就去咗電台做 DJ。大家可以係佢 Instagram 見到，佢同 Kary Stephy 關係都仲好好！

#006 & #007 蒲茜兒（Serena）及陳素瑩（Gloria）

當年覺得 Serena 同 Gloria 好可愛！今年係 Stephy IG 就見到佢哋，素顏嘅 Serena 都仲係好靚，囡囡都勁可愛！聽講佢依家有 2 個囡囡，仲已經移民加拿大添～至於 Gloria 就成為學霸，先係英國修畢金融同會計課程，之後又係曼徹斯特商學院修畢碩士學位，依家係香港四大會計師樓之一氏德勤任職高級審計員！

#008 何綺玲（Elaine）

完全係凍齡啊！本身生得好可愛嘅佢，依家已經做咗人哋媽媽，但都仲係 keep 得勁好！到底是咪食咗防腐劑？？？

#009 馬思恆（Helena）

至於 Helena 真係超超超低調，小編完全搵唔到佢嘅近照⋯有傳聞話，佢係美國修畢兩個碩士學位，分別係婚姻家庭治療師以及藝術治療，後來係加州修讀博士學位。依家仲成為持牌婚姻治療師兼藝術治療師！