外界一直都好好奇方力申（小方）同鄧麗欣（Stephy）分手之後，戀情幾時會有著落。最近終於有好消息啦！佢同年輕藝術家葉萱（Maple）拍緊拖，兩人年紀相差十幾年。有人稱Maple同Netflix紀錄片《以神之名：信仰的背叛》中嘅邪教受害者葉萱係同一人，而其後小方接受媒體訪問嘅時候都承認咗呢個猜測。

女友Maple曾經所遭受嘅邪教教會經歷包括被性侵等，方力申表示兩人相識第一日已經知道，自己亦都有睇到Netflix紀錄片中女友嘅受訪片段，感到好心痛：「我非常欣賞她的勇敢，遇到一些不公平的事一定要挺身而出，去告發他們。第一眼會覺得很心寒，第二會覺得為什麼你這麼天真，這麼幼稚，但她做的事情可能允許我們所有人都更加堅強，看完後會更加珍惜他。很心寒，很心痛，更覺得她聰明。」 小方亦表示依家公開戀情後，希望可以陪女友親身去韓國出庭。

Maple曾經係韓國「基督教福音宣教會又名耶穌晨星教會（Jesus Morning Star，縮寫JMS）」，又稱為「攝理教」嘅教徒。教主鄭明析會利用聖經及教義來向信徒洗腦，涉足多國，喺世界多個地方都有佢嘅教徒。佢會挑選樣貌娟好、身材高挑嘅女教徒落手，叫佢哋成為「主嘅新娘」，神服於主，然後性侵多名女教徒。曾經因為性侵罪入獄十年，但放獄後一樣重施故技，Maple喺鄭明析獄後得到器重及成為「新娘」之一，多次被對方性侵。

Maple喺紀錄片中聲淚俱下詳述自己被鄭明析性侵嘅過程，更同意公開34秒恐怖變態錄音。錄音中，鄭明析表示：「抱我，抱緊我，說妳會永遠愛主。」、「我們的秀晶屁股真大，妳很舒服吧？」、「我好像高潮了50次」，內容極為不雅，更令觀眾感不安及心痛。Maple勇敢企出嚟揭發邪教教主獸行係希望唔好再有人受傷，呢個舉動得到網民一致力撐，仲讚小方係真男人！