要數最近嘅世界大事一定係世界盃阿根廷攞冠軍啦～球王美斯經過2014年飲恨同冠軍擦身而過，最終喺今年35歲夢想成真，拎到日思夜想嘅世界冠軍！美斯喺愛情方面嘅專一程度同足球一樣，鍾意咗嘅就係一世～原來美斯同老婆Antonella Roccuzzo 9歲時喺朋友聚會上認識，美斯對老婆一見鍾情，深深畀佢吸引咗！

-9歲訂下一生誓約

9歲嘅美斯已經好大膽咁同Antonella示愛表白：「可以做我女朋友嗎？」，佢仲寫情信話佢哋兩個總有一日會訂婚！對於得幾歲人仔講嘅說話Antonella無當真，直接拒絕咗美斯嘅表白，但球王又點會咁輕易放棄呢～

-成青梅竹馬朋友無所不談

自相識之後，佢哋成日都一齊玩，成為青梅竹馬嘅好朋友～直到13歲嗰年，美斯因為要去追逐足球夢，需要離開阿根廷飛去西班牙，兩小口要分隔兩地，只可以靠ICQ聯繫。而每次美斯返阿根廷嘅時候，佢哋都好珍惜兩人相處嘅時間。2005年，Antonella因為朋友遇到交通意外去世而大受打擊，美斯仲特登飛返阿根廷陪佢添～

-發覺對方係無可取代最終成為戀人

Antonella被美斯嘅舉動所感動，發現有啲感覺只可以喺美斯身上搵到，係無可取代嘅，後來佢就同拍拖3年嘅男朋友分手。

-為美斯定居西班牙

2009年美斯曾經公開承認有女朋友，但就無公開女朋友嘅身份，只係講佢住喺阿根廷。依家大家當然知道呢個女朋友就係Antonella，不過可以見到嗰個時候嘅美斯為咗保護愛苗，對外非常低調。

-組織一家五口幸福家庭

兩人 喺2017年結婚，育有三子，三個仔仔都係爸爸嘅忠實粉絲，成日喺唔同嘅球賽都會見到佢哋好落力打氣㗎～

-與老婆約定一齊變老

浪漫嘅美斯曾經寫情信畀老婆講過比賽嘅輸贏唔算得係乜嘢，家庭比起足球嚟講對佢更加重要，佢嘅目標唔再係更多嘅獎杯，而係同佢哋一齊變老～天啊！美斯踢波又勁，又專一同浪漫，呢個男人會唔會太完美！